Ek het besluit om myself van die tandemuis te distansieer. Na my mening kan daar weinig goed kom van enige irasionele gelofie - hoe vlugtig dit ookal is, en hoe onskuldig dit op die oog af mag lyk. Dit maak vir my sin om - veral kinders - se redenasievermoëe sommer vroeg al te staal teen nie net die katastrofiese impak van geloof nie, maar ook die mikro-inbreuke van sogenaamde bygeloof. Ek vermoed hierdie het my siening geraak sedert daardie bespreking oor die moontlikheid van langtermyn verandering in die breine van gelowiges elders op hierde forums.
Maar ongelukkig is die ideale modelle wat jy in jou kop opbou en vir jou kinders beplan selde uitvoerbaar in die regte wêreld - nog meer so as jy getroud is. Die ander volwassene in ons huishouding is verreweg meer, erm, romanties as ek, en daarom ten gunste van die hierdie tradisionele kinderfantasieë, of dit nou sterte, ore, of 'n baard en 'n rooi boilersuit het. Sy reken dat dit selfsugtig is om kinders van hierdie “plesiertjies” te ontneem. Nou, ek weet nie of die ongetroudes hier ten volle besef hoe 'n huwelik werk nie, maar dis tot 'n groot en irriterende mate 'n toetsgrond vir alles wat al ooit geskryf was oor konflik en onderhandeling - van Freud en Jung, deur Gandhi en Buddha, tot Neumann en Nash.
Dus is ons laaitie voetstoots oortuig van die bestaan van al drie die tradisionele kiddy-icons.
In die begin was ek grommig oor die hele storie toe hy sy eerste tandjie op instruksie in die pantoffel druk. Die volgende oggend het dit in geld verander. (Meer geld as wat ek dink enige enkele tand werd is, en ek het die tandemuis later gekonfronteer met 'n boek Human Anatomy and Physiology wat ek 'n paar jaar terug op 'n skip se boekwinkel aangeskaf het. Ek was nogal geamuseerd om te sien dat die tandemuis effe geskok was toe sy lees hoeveel tande kinders nou werklik wissel - 'n paar honderd rand s’n ;D)
So gister, met die val van nog 'n premolaar, het ek verwag dat die episode weer sal herhaal. Maar helaas, die tandemuis was in vir 'n verassing: geen pantoffel onder die bed nie. Hoe die tandemuis ookal soek, kon sy net nie laasnag die tandjie opspoor nie. Die tandemuis het egter haar slaap nodig, en het toe maar opgegee na 'n halfuur.
Vanoggend moes ons hoor dat boetie sy tand in die hoek van 'n laai weggesteek het, binne-in 'n ou radio. Hoekom? Want hy wou toets of die muis sal weet waar om te kyk. Ek is nie trots om te sê dat ek my openlik verlustig het aan die ingewikkelde en onsamehangende verskonings wat Mev Kent moes uitdink nie. En as ek so na sy gesiggie kyk, dink ek hy het min of meer dieselfde gedagtes gekoester.
Miskien is daar tog hoop.
Rigil