ag frek, nou is dit Jannie Jammergat en Berta Bitterpis se beurt:
Dit was net die foon, net die wind
deur Estelle Kellerman
2011-05-22 18:36
Ek skryf vanoggend, die Sondag ná 21 Mei, ’n brief vir jóú meneer, wat beweer het dat gister die oordeelsdag was.
’n Brief, nie “fancy” nie, want ek is woedend vir jou.
Ek het op 21 Mei heeldag soos ’n hen gevoel wat haar kinders onder haar vlerke wou hou en beskerm. Ek was so bang.
Ek is lief vir my Here en het baie gebid dat ons tog veilig bly. Ek glo altyd in Sy liefde, barmhartigheid en almagtigheid. Wat moet Hy nie nou van my dink nie, ek het Hom wantrou.
Ek kon nie gisteraand slaap nie. Het die skaduwee buite dopgehou, het lig gesien, maar ek het besef dis die selfoon. My seun het ’n nagmerrie gehad – ek het gedink dit is dit… maar hy het net gedroom.
Sien meneer, ek het ook dalk tekens gesien, maar het nie vir buurman wakker geklop en gesê daar is oorlog in ons dorp nie. Dit was maar net die selfoon, dit was maar net die wind.
Ek is kwaad vir jou, meneer.
Toe ek vanoggend wakker word met voëltjies wat sing en buurman se vier honde wat blaf, voel ek skaam.
Estelle Kellerman
Wellington
en
Wag op vuur en swael eis sy tol
deur Robert Nel
2011-05-22 18:36
Dit is Sondagoggend en ek is uitgeput. Ek het die hele aand, met my kop onder die kussing en in ’n koue sweet, die Onse Vader saggies geprewel.
Met die kleinste kraakgeluid of die blaf van bure se honde het ek opgespring en by die venster uitgeloer. Verwagtend om vuur en swael buite te sien wat ons buurt verswelg.
My ore was gespits vir die gekerm van stemme. My familie in Nieu-Seeland is hoogs die hel in vir my omdat ek hulle drie-uur in die oggend (by hulle) geskakel het om te hoor of die einde al daar aangebreek het.
Wat is daar van my verwag ná die volbladadvertensie in kleur (DB, 21.05) wat die volk se aandag gevestig het op die einde van die wêreld wat sou aanbreek?
Mag ek hierdie godsdienstiges vir pyn en lyding dagvaar? Verwag hulle om in die toekoms ernstig opgeneem te word?
Vir eers gaan ek druppels in my bloedbelope oë gooi en wag vir hierdie narre se encore.
Robert Nel
Strand
http://www.dieburger.com/MyDieBurger/Briewe
En die mense is nie eens skaam om hul egte name te publiseer nie…